حكمة حصان

قصة بهديها لكل الشباب قصة اسمها: "حكمة حصان

إيه حكمة الحصان ..؟

بيقولك إن كان فى حصان ماشى مع صاحبه .. فى وسط الطريق كانت فى حفرة كبيرة .. وقع الحصان فى الحفرة .. فضل يرفص ويصرخ مش عارف يطلع من الحفرة .. حفرة زى الحفرة اللى فيها امتنا بقالها 200 سنة مش عارفة تطلع من الحفرة

والحصان بدء يرفص ويصرخ .. زى ما احنا بنرفص ونصرخ مش عارفين نطلع من الحفرة

صاحبه حاول كل المحاولات عشان يطلعه مفيش فايدة، وحاول يرفعه معرفش .. وفى الآخر ملقاش صاحبه غير حل واحد .. إنه يردم عليه عشان يموت .. لأن تكلفة اخراجه من الحفرة اعلى من قيمته ..!!!0

صاحبه بدء يردم على الحصان .. الحصان بدء يصرخ بدء يفهم إنه هيموت .. يردم عليه والحصان يصرخ ويصرخ ويصرخ .. لكن بعد شوية الحصان بطل يصرخ .. فهم إن الصريخ مش هيجيب نتيجة .. بعد شوية الحصان سكت خالص

صاحبه افتكر إنه مات .. راح يبص على الحفرة عشان يشوف الحصان حصله ايه

لقى إن الحصان مامتش وإنه عايش .. بس بيعمل فكرة ذكية

لقى الحصان كل ما يترمى عليه التراب والرمل يروح نافض التراب من على ضهره عشان التراب ينزل تحت رجليه فيطلع عليه ويرفعه شوية بشوية

وبئى بعد ما كان الردم هو اللى هيموته بئى الردم هو اللى بينجيه .. لأنه ذكى وعرف ازاى يستفيد من المشكلة اللى هو فيها .. وفضل صاحبه يرمى التراب والردم اكتر والحصان ينفض التراب تحت رجليه ويطلع ويعلى ويعلى

صحيح بيطلع شوية بشوية وصحيح هيأخد وقت طويل على ما يطلع من الحفرة .. بس هيطلع

اكتشف الحصان إن الصراخ والاكتئاب واليأس بيستنفذ من طاقته .. وهتكون النتيجة إنه هيفضل فى الحفرة ويموت

ياشباب .. قلدوا الحصان

يا أمة ياللى حاسه إن الحل إننا نصرخ ونصوت .. قلدوا الحصان

اعملوا عمل ذكى يخرجنا من الحفرة

الحفرة اللى موجودة جوا كل واحد فينا والحفرة الاكبر اللى احنا عايشين فيها

*****************************************

القصة دى عايزة تقولك اوعى تيأس .. عايزة تقولك خلى عندك أمل .. عايزة تقولك فى فايدة .. جرب .. اتحرك .. خد موقف .. لازم تنجح