<div align="center"><font color="blue" face="Arial Black"><b>رباعيات صلاح چاهين<br>===============<br>خرج ابن آدم من العدم قلت : ياه<br>رجع ابن آدم للعدم قلت : ياه<br>تراب بيحيا ... وحي بيصير تراب<br>الأصل هو الموت و الا الحياه ؟<br>عجبي !!!<br>===============<br>ضريح رخام فيه السعيد اندفن<br>و حفره فيها الشريد من غير كفن<br>مريت عليهم .. قلت يا للعجب<br>لاتنين ريحتهم لها نفس العفن<br>عجبي !!!<br>===============<br>ياما صادفت صحاب و ما صاحبتهمش<br>و كاسات خمور و شراب و ما شربتهمش<br>أندم علي الفرص اللي انا سبتهم<br>و الا علي الفرص اللي ما سبتهمش<br>عجبي !!<br>===============<br>و الكون ده كيف موجود من غير حدود<br>و فيه عقارب ليه و تعابين ودود<br>عالم مجرب فات و قال سلامات<br>ده ياما فيه سؤالات من غير ردود<br>عجبي !!!<br>===============<br>أنا شاب لكن عمري ألف عام<br>وحيد لكن بين ضلوعي زحام<br>خايف و لكن خوفي مني أنا<br>أخرس و لكن قلبي مليان كلام<br>عجبي !!!!<br>===============<br>يا باب يا مقفول ... إمتي الدخول<br>صبرت ياما و اللي يصبر ينول<br>دقيت سنين ... و الرد يرجع لي : مين ؟<br>لو كنت عارف مين أنا كنت أقول<br>عجبي !!!<br>===============<br>أحب أعيش ولو في الغابات<br>أصحي كما ولدتني أمي و ابات<br>طائر .. حوان.. حشرة .. بشر ..بس أعيش<br>محلا الحياة.. حتي في هيئة نبات<br>عجبي !!<br>===============<br>سهير ليالي و ياما لفيت و طفت<br>و ف ليه راجع في الضلام قمت شفت<br>الخوف ... كأنه كلب سد الطريق<br>و كنت عاوز أقتله .. بس خفت<br>عجبي !!<br>===============<br>كان فيه زمان سحليه طول فرسخين<br>كهفين عيونها و خشمها بربخين<br>ماتت لكين الرعب لم عمره مات<br>مع إنه فات بدل التاريخ تاريخين<br>عجبي !!<br>===============<br>عجبتني كلمة من كلام الورق<br>النور شرق من بين حروفها و برق<br>حبيت أشيلها ف قلبي .. قالت حرام<br>ده أنا كل قلب دخلت فيه اتحرق<br>عجبي !!!<br>===============<br>رقبه قزازة و قلبي فيها انحشر<br>شربت كاس و اتنين و خامس عشر<br>صاحبت ناس م الخمرة ترجع وحوش<br>و صاحبت ناس م الخمرة ترجع بشر<br>عجبي !!!!<br>===============<br>ليه يا حبيبتي ما بيننا دايما سفر<br>ده البعد ذنب كبير لا يغتفر<br>ليه يا حبيبتي ما بيننا دايما بحور<br>أعدي بحر ألاقي غيره اتحفر<br>عجبي !!!<br>===============<br>ورا كل شباك ألف عين مفتوحين<br>و انا وانتي ماشيين يا غرامي الحزين<br>لو التصقنا نموت بضربة حجر<br>و لو افترقنا نموت متحسرين<br>عجبي !!!<br>===============<br>نوح راح لحاله و الطوفان استمر<br>مركبنا تايهه لسه مش لاقيه بر<br>آه م الطوفان وآهين يا بر الأمان<br>إزاي تبان و الدنيا غرقانه شر<br>عجبي !!<br>===============<br>علي رجلي دم .. نظرت له ما احتملت<br>علي إيدي دم.. سألت ليه ؟ لم وصلت<br>علي كتفي دم.. و حتي علي رأسي دم<br>أنا كلي دم .. قتلت ؟ ..... والا اتقتلت<br>عجبي !!<br>===============<br>انا كل يوم أسمع ........ فلان عذبوه<br>أسرح في بغداد و الجزاير واتوه<br>ما أعجبش م اللي يطيق بجسمه العذاب<br>و اعجب من اللي يطيق يعذب أخوه<br>عجبي !!!<br>===============<br>ينبوع و في الحواديت أنا سمعت عنه<br>إنه عجيب .. و ف وسط لهاليب لكنه<br>شقيت كما الفرسان طريقي .. لقيت<br>حتي الخنازير و الكلاب شربوا منه<br>عجبي !!!!<br>===============<br>يا قرص شمس ما لهش قبة سما<br>يا ورد من غير أرض شب و نما<br>يا أي معني جميل سمعنا عليه<br>الخلق ليه عايشين حياه مؤلمة<br>عجبي !!!<br>===============<br>شاف الطبيب جرحي وصف له الأمل<br>وعطاني منه مقام يا دوب ما اندمل<br>مجروح جديد يا طبيب و جرحي لهيب<br>ودواك فرغ مني .... و إيه العمل<br>عجبي !!!<br>===============<br>أعرف عيون هي الجمال و الحسن<br>و اعرف عيون تاخد القلوب بالحضن<br>و عيون مخيفة و قاسية وعيون كتير<br>وباحس فيهم كلهم بالحزن<br>عجبي !!<br>===============<br>إيش تطلبي يا نفس فوق كل ده<br>حظك بيضحك و انتي متنكده<br>ردت قالت لي النفس : قول للبشر<br>ما يبصوليش بعيون حزينة كده<br>عجبي !!<br>===============<br>إقلع غماك يا تور وارفض تلف<br>إكسر تروس الساقية و اشتم وتف<br>قال : بس خطوة كمان .. وخطوة كمان<br>يا اوصل نهاية السكة يا البير تجف<br>عجبي !!!<br>===============<br>يا حزين يا قمقم تحت بحر الضياع<br>حزين أنا زيك و إيه مستطاع<br>الحزن ما بقالهوش جلال يا جدع<br>الحزن زي البرد ... زي الصداع<br>عجبي !!!!<br>===============<br>في يوم صحيت شاعر براحة و صفا<br>الهم زال و الحزن راح و اختفي<br>خدني العجب و سألت روحي سؤال<br>أنا مت ؟ و لا وصلت للفلسفة<br>عجبي !!!<br>===============<br>الفيلسوف قاعد يفكر سيبوه<br>لا تعملوه سلطان و لا تصلبوه<br>ما تعرفوش إن الفلاسفه يا هوه<br>اللي يقولوه بيرجعوا يكدبوه<br>عجبي !!!<br>===============<br>علي بعد مليون ميل من أرضنا<br>من الفراغ الكوني بصيت أنا<br>لا شفت فرق بين جبال و بحور<br>و لا شفت فرق ما بين عذاب أو هنا<br>عجبي !!<br>===============<br>إنسان أيا إنسان ما أجهلك<br>ما أتفهك في الكون و ما أضألك<br>شمس وقمر و سدوم و ملايين نجوم<br>و فاكرها يا موهوم مخلوقه لك<br>عجبي !!<br>===============<br>نظرت فوق للنجوم و انا ساير<br>رجليا عترت في الحفر و الحجاير<br>بقيت أقول و انا ع التراب: يا سلام<br>مش بس عبره أخذت لكن عباير<br>عجبي !!!<br>===============<br>- يا نجم .. نورك ليه كده بيرتجف ؟<br>هو انت قنديل زيت ؟ أو تختلف<br>- أنا نجم عالي .. بس عالي قوي<br>و كل ما انظر تحت اخاف انحدف<br>عجبي !!!!<br>===============<br>السم لو كان في الدوا منين يضر ؟<br>و الموت لو عدونا .. منين يسر؟<br>حط القلم في الحبر و اكتب كمان<br>.. و العبد للشهوات .. منين هو حر؟<br>عجبي !!!<br>===============<br>وقفت بين شطين علي قنطــــــــــــــــــرة<br>الكدب فين و الصدق فيـــــــــــن يا تري<br>محتار ح اموت .. الحوت خرج لي وقالي<br>هو الكلام يتقــــــــــــاس بالمســـــــــــطرة<br>عجبي !!!<br>===============<br>سرداب في مستشفي الولاده طويل<br>صرخات عذاب ورا كل باب وعويل<br>.. وفي الطــــــريق متزوقين البنات<br>متزوقـــــــــــــين للحب و المواويل<br>عجبي !!<br>===============<br>الدنيا أوده كـــــــــــبيره للانتظار<br>فيها ابن أدم زيه زي الحـــــــمار<br>الهم واحد .. و الملل مشــــــترك<br>و مفيش حمار بيحاول الانتـــــحار<br>عجبي !!<br>===============<br>أيوب رماه البين بكل العـــــــــلل<br>سبع سنين مرضان وعنده شلل<br>الصــــبر طيب .. صبر أيوب شفاه<br>بس الأكـــــــــاده مات بفعل الملل<br>عجبي !!!<br>===============<br>نسمة ربيع لكن بتكوي الوشـــــــوش<br>طيور جميلة بس من غير عشـــوش<br>قلوب بتخفق إنما وحـــــــــــــــــدها<br>هي الحياه كده .. كلها في الفاشوش<br>عجبي !!!!<br>===============<br>يا طير يا عالي في الســــــما طظ فيك<br>ما تفتكرشي ربنا مصطــــــــــــــــفيك<br>برضـــــــــــك بتاكل دود و للطين تعًًًًودً<br>تمـــــــــص فيه يا حلو .. و يمص فيك<br>عجبي !!!<br>===============<br>كروان جريح مضروب شعاع م القمر<br>سقط من السموات فؤاده انكســـــــــر<br>جريت عليه قطه علشان تبلعـــــــــــه<br>أتاريه خيال شعراء و مالهـــــوش أثر<br>عجبي !!!<br>===============<br>ياللي نصحت الناس بشــــــــــــــرب النبيت<br>مع بنت حلوه .. وعود , وضحك , وحديت<br>مش كنت تنصحهم منين يكســــــــــــــــبوا<br>تمن ده كله ؟ ... و الا يمكن نســـــــــــيت<br>عجبي !!<br>===============<br>ما حد في الدنيا واخد جزاتــــــــــــــــــه<br>و لا حــــــــــــــــد بيفكر في غير لذاذاته<br>ما تعرفيش يا حبيبتي .. أنا و انتي مين؟<br>إنتي عروس النيل ... و أنا النيل بذاته<br>عجبي !!<br>===============<br>رقاصه خرسا و رقصه من غير نغــم<br>دنيا . . يا مين يصالحها قبل النـــــدم<br>ساعتين تهز بوجههـــــــــــــــا يعنـي<br>يترجرجوا نهديها يعني نعـــــــــــــــم<br>عجبي !!!<br>===============<br>إخطفني ياللي تحبني ع الحصان<br>الدنيا قالت يوم في ماضي الزمان<br>إخطفني ياللي تحبني ع الـــــفرس<br>الدنيا قالت .. قام خطفها الشيطان<br>عجبي !!!!<br>===============<br>من بين شقوق الشيش و شقشقت لك<br>مع شهقة العصافير و زقزقـــــــت لك<br>نهار جديد انا . . قوم نشوف نعــمليه<br>انا قلت يا ح تقتلني .. يا ح اقــــــــتلك<br>عجبي !!!<br>===============<br>جالك أوان ووقفت موقف وجـــود<br>يا تجود بده يا قلبي يا بده تجــــود<br>ما حد يقدر يبقي علي كل شـــــــئ<br>مع إن – عجبي – كل شئ موجود<br>عجبي !!!<br>===============<br>جالك اوان وعرفت مشي الجنايــــــــز<br>كيف شفتها يا عبد رب اللذايــــــــــــذ<br>قال : شفت شيل بالحيل فقير أو اميـــر<br>كما شالوا في الخمامير فواضي القزايز<br>عجبي !!<br>===============<br>أنا كنت شئ و صبحت شئ ثم شــئ<br>شوف ربنا .. قادرعلي كل شـــــــئ<br>هز الشجر شواشيه ووشوشني قال :<br>لابد ما يموت شئ عشان يحيا شئ<br>عجبي !!<br>===============<br>يا مشرط الجراح أمانة علـــــــــــيك<br>و انت ف حشايا تبص من حواليــك<br>فيه نقطة سوده في قلبي بدأت تبان<br>شيلها كمان .. و الفضل يرجع إليك<br>عجبي !!!<br>===============<br>كيف شفت قلبي و النبي يا طبيــــــــــــب<br>همد و مات و الا سامع له دبيـــــــــــــب<br>قاللي لقيته مختنق بالدمـــــــــــــــــــــوع<br>و ما لوش دوا غير لمسه من إيد حبيب<br>عجبي !!!!<br>===============<br>تسلم يا غصن الخوخ يا عود الحطـــــــــب<br>بييجي الربيع .. تطلـــــــــــع زهورك عجب<br>و انا ليه بيمضـــــــــــي ربيع وييجي ربيع<br>و لسه برضك قلــــــــــــــــــبي حتة خشب<br>عجبي !!!<br>===============<br>قلبي عليل يا ناس و في الكاس دواه<br>مديت له إيدي شربت م اللي حــــواه<br>جنبي الشمال خف .. اليمين اتــــوجع<br>و إيه يداوي الكبد م اللي كـــــــــــواه<br>عجبي!!<br>===============<br>.. دي مزكرات و كتبتها من ســـــــــنين<br>في نوتة زرقا لون بحور الحنيــــــــــــن<br>عترت فيها .. رميتها في المهمـــــــلات<br>وقلت صحيح أما صحيح كلام مخبولين<br>عجبي !!<br>===============<br>دخل الشتا وقفل البيبان ع البـــيوت<br>وجعل شعاع الشمس خيط عنكبوت<br>وحاجات كتير بتموت في ليل الشــتا<br>لكن حاجات أكتر بترفض تمــــــوت<br>عجبي !!<br>===============<br>الدنيا من غير الربيع مــــــــيته<br>ورقة شجر ضعفـــــــانه و مـــفـــــتــته<br>لا يا جدع غلطان تأمل وشوف<br>زهر الشتا طالع فــــــــي عز الشـــــتا<br>عجبي !!!<br>===============<br>ياللي انت بيتك قش مفروش بريش<br>تقوي عليه الريح .. يصبح ما فيش<br>عجبي عليك حواليك مخالب كـــــبار<br>و ما لكش غير منقار و قادر تعيش<br>عجبي !!!!<br>===============<br>سمعت نقطة ميه جوه المحيـــــــط<br>بتقول لنقطه ما تنزليش في الغويط<br>أخاف عليكي م الغرق .. قلـــــت أنا<br>ده اللي يخاف م الوعد يبقي عبيط<br>عجبي !!!<br>===============<br>بحر الحياه مليان بغرقي الحياه<br>صرخت خش الموج في حلقي ملاه<br>قارب نجاه .. صرخت قالوا مفيش<br>غير بس هو الحب قارب نجاه<br>عجبي !!!<br>===============<br>فارس وحيد جوه الدروع الحديد<br>رفرف عليه عصفور وقال له نشيد<br>منين .. منين.. و لفين لفين يا جدع<br>قال من بعيد و لسه رايح بعيد<br>عجبي !!<br>===============<br>كان فيه قمر كأنه فرخ الحمام<br>علي صغره دق شعاع شق الغمام<br>أنا كنت حاضر قلت له ينصرك<br>إشحال لما حتبقي بدر التمام<br>عجبي !!<br>===============<br>النهد زي الفهد نط اندلع<br>قلبي انهبش بين الضلوع و انخلع<br>ياللي نهيت البنت عن فعلها<br>قول للطبيعة كمان تبطل دلع<br>عجبي !!!<br>===============<br>صوتك يا بنت الإيه كأنه بدن<br>يرقص يزيح الهم يمحي الشجن<br>يا حلوتي و بدنك كأنه كلام<br>كلام فلاسفه سكروا نسيوا الزمن<br>عجبي !!!!<br>===============<br>كرباج سعاده وقلبي منه اجلد<br>رمح كأنه حصان و لف البلد<br>و رجع لي نصل الليل و سألني .. ليه<br>خجلان تقول انك سعيد يا ولد<br>عجبي !!!<br>===============<br>مزيكة هادية الكون فيها انغـــــمر<br>وصيف و ليل و عقد فل و سمر<br>يا هلتري الناس كلهم مبسوطين<br>و يا هلتري شايفين جمال القمر ؟<br>عجبي!!<br>===============<br>إنشد يا قلبي غنوتك للجمــــــــــــــــــال<br>و ارقص في صدري من اليمين للشمال<br>ما هوش بعيد تفضل لبكره سعيــــــــــد<br>ده كل يوم فيه الف الف احتمـــــــــــــال<br>عجبي !!<br>===============<br>آه لو انا و محبوب جزنا الفضـــــا<br>في سفينة وحدينا .. واشيا رضـــا<br>ساعة صفا تعجبنا نرجع لهــــــــــا<br>و الهم قبل ما ييجي .. يبقي مضـى<br>عجبي !!<br>===============<br>أنا إله الوجد رب الهيــــــــــــــــام<br>أضرب بسهم الوهم وهم الغـــــرام<br>و هم الغرام من كتر ما هو لذيـــــذ<br>رشقت انا ف صدري جميع السهام<br>عجبي !!!</b></font></div>